Amajambo yashikirijwe n’umurwizatunga w’umunyarwanda, Sadate Munyakazi, yaravuzweko ibitari bike. Aho yariko aganiririra urwaruka rw’umugambwe uri k’ubutegetsi mu Rwanda FPR mu karere ka Gicukiro, mu gisagara ca Kigali, kw’igenekerezo rya 12 Gitugutu 2025, yaruhamagariye gukora rutiziganya kugira mu mwaka wa 2050, ruzobe arirwo rutanga akazi.
Ijambo yashikirije ryarateye icuka aho yongeyeko, yuko abanyarwanda bashobora «kuzoba baha akazi abarundi n’abakongomani ko gukubura amabarabara no gusukura utuzu tw’ubwiherero».
Ayo majambo afatwa nkayuzuye agasuzuro, akaba yarababaje abatari bake, uretse abarundi n’abakongomani bakoresha imbugahwaniro, eka n’abanyarwanda batari bake, aho mbere basavye ko yosaba imbabazi k’umugaragaro.
Aho kwigarura, Munyakazi ahubwo akaba k’urubuga rwiwe rwa X, yahavuye yandikako inyuma yaho agira ati: «indongozi zigisha gucanamwo aho guteza imbere ibihugu zirongoye, ntakindi ziba zigamije atari ukuraga abanyagihugu babo kuba abacakara muri kazoza. »
Yaranongeye aravyunyura aho yavuze ko Urwanda rwakiriye abarundi n’abakongomani mukubakingira ukudatwarwa n’ikiyaga.
FPR iriyamiriza uyo murwizatunga
Inyuma yivyo vyashikirijwe, indongozi mu mugambwe FPR zarihuse kugira ico zishikirije. K’urubuga rwiwe rwa X, Abdelaziz Murenzi yagize ati: «ivyashikirijwe na Munyakazi biraba we ubwiwe ntabwo ari ivyashikirijwe n’umugambwe FPR canke abanyarwanda bose muri rusangi». Yaranibukije ko abanyarwanda bamana k’umutima: « ukuntu bakiriwe imyaka itari mike mu bihugu bibanyi inyuma yuko biyubaka».
Umushikiranganji w’imigenderanire Olivier Nduhungirehe, wewe akaba yarasubije k’umurongo umumenyeshamakuru wa Radiyo Tv10 yariko asa n’uwufata minenerwe ayo majambo ya Munyakazi. Aho yagira ati ntiyumva ukuntu bomwiyamiriza kandi ivyo yashikirije ari «ukuri». Nduhungirehe yagize ati: «hagarika ivyo uvuze, nukuja uramenya ko ukurikirwa n’abantu benshi».
Gusaba imbabazi bisa nivyagiyemwo inguvu
Kw’igenekerezo rya 16 Gitugutu, Sadate Munyakazi yahavuye asaba imbabazi k’umugaragaro. Ariko kubatari bake izo mbabazi zoba zavuye ku gitsure c’abatari bake bamuteye.
Ninako Balthazar Niyonzima, umurundi yegereye ubutegetsi bwa Gitega abibona, aho yanditse k’urubuga rwiwe rwa X yemeza ko Munyakazi «yanditse ivyo ubutegetsi bw’Urwanda bwibaza ariko butavugira hejuru». Kubwiwe, ayo majambo yoba yerekana ugushaka kw’abanyarwanda kwo gushira mubucakara impunzi ziriyo.
Icuka gifise ico gisigura
Uko biri kwose, umuntu agerageje gusesangura, ivyashikirijwe na Sadate Munyakazi bigaragaza ukutabona kure muvya poritike hamwe no kudashobora gutandukanya indongozi n’abo zirongoye. Abanyagihugu batobato nta ruhara bafise mu ngorane ibihugu birimwo, ivyo bikagaragaza yuko uyo murwizatunga yoba atavyo azi.
Mubihe nk’ibi hariho ukutumvikana mukarere hagati y’Urwanda n’ibihugu bibanyi, amajambo yashikirijwe asa n’ayaje akubita agati mu ntozi.