Amakuru yahanahanywe ku mbugahwaniro arahushanye n’uko ibintu vyifashe, abasirikare b’abarundi ntibariko barakinjura mu gisagara ca Uvira, mu ntara ya Kivu yepfo m’ubuseruko bwa Congo. Amatohoza yakozwe na Burundi Facts hamwe na Congo Check ku basirikare hamwe n’aba baba ngaho n’uko n’ubu abasirikare b’abarundi bakiri Uvira, ahubwo nyabuna ko baguma bitunganya neza kuko hari n’abandi basirikare baguma barungikwa gufasha abasanzweyo.
Vyose vyatanguriye k’urukurukuru rwaciye k’urubuga rwa X rw’uwiyita SimarongoNgongoMba, aho yemeza ko inyuma y’intambara hagati y’igisirikare ca Congo FARDC hamwe n’umurwi w’abarwanyi ba Wazalendo, ko igisirikare c’Uburundi coba caciye gihitamwo gukinjura muri Uvira.
Iyo nkuru yaratumye aba nabariya bagira ico bayivuzeko ku mbugahwaniro, bamwe bakaba baravyemeye kwarivyo abandi n’abo bakaba baguma babaza iyo iyo nkuru yazananye.
Mu vyukuri iyo nkuru nta makuru namwe yizewe ayiherekeza canke amakuru atangwa n’igisirikare. Igisirikare c’Uburundi FDNB ntakintu nakimwe kirigera gishikiriza, canke abategetsi ba Congo.
Inkuru yagiye irabeshuzwa n’amasoko yo kwizera
Umwe mubasirikire bakuru b’abarundi yaganiriye na Burundi Facts agira ati: «Inkuru nk’iyo ntiyari ku ncika, kuko nguma ngavye, n’abasirikare banje, kugira tuje gufasha mu gisagara ca Uvira hamwe coterwa. »
Birigade (Brigade) imwe igizwe n’amakambi abiri imwe yose iba irimwo abasirikare 800, ni ukuvuga bose hamwe ni 1600. Abasirikare b’abarundi, abarungitswe barashitse 9600, umuntu adashizemwo imbonerakure zigera ku 3000 nazo nyene zarungitswe gukorana n’igisirikare.
Amakuru dukura mubakorera mu gisata ca kumenyeshamakuru muri FDNB aravyemeza akagira ati: «Sindigera numva hari uwuvuga ko hari abasoda boba bakuwe Uvira.Kuko iyo hafashwe ingingo mwe n’izo bimwe mu bisata vyacu birabimenyeshwa.»
Amakuru dukura mu Cibitoke aremeza ko hari abasirikare b’abarundi binjiye muri RDC kw’igenkerezo rya 19 Nyakanga 2025. Amajana y’abasirikare barikumwe y’imbonerakure barajabutse baciye kw’ibarabara rya 6 ku kiraro ca Kaburantwa, mu karere k’ikiyaya ca Rusizi berekeza i Sange, igice cegereye igisagara ca Uvira.
Ayo makuru aremeza mbere ubu ko ikigaragara ari uko atari abasirikare b’ababarundi bagenda, atabava muri Congo binjira mu Burundi. Ivyo rero bikaba biza bishimangira ko vyukuri aho gukura abasirikare kubirindiro muri Uvira , igisirikare c’Uburundi kiriko kirabikomeza.
Igituma abasirikare b’abarundi barungikwa muri RDC
Uburundi bwarungitse abasirikare kuva muri Gitugutu 2023, mu ntumbero yo gushira mu ngiro amasezerano yo gufashanya muvya gisirikare hagati y’Uburundi n’igihugu ca RDC, yateweko umukono muri Myandagaro 2023 i Kinshasa. Ihangiro nyamukuru ni ugutuza umurwi wa M23, gushigikira FRDC hamwe n’abo bafashanya mu buseruko bwa Congo.
Murimake
Urukurukuru ruvuga ko igisirikare c’Uburundi coba gishaka gukinjura ntashingiro rufise. Amatohoza yacu yerekana igihushane: uretse ko igisirikare c’Uburundi kitariko kirakinjura ahubwo kiriko kiritunganya neza kurusha mu gukomeza ibirindiro, kuva hashitseyo birigade igira kabiri.